MATA

Sa unang pagkakataon mga mata’y nagkasalubong

Hindi inaakalang may uusbong na pagtitinginan

Sa paglipas ng panahon

Bawat kurap ay ‘di pinalagpas

Nasundan ang unang pagkikita

Muli na namang nagkita sa hindi inaasahang pagkakataon

Mga mata’y waring nangungusap

Tila may gustong ipahayag

Nagkapalagayan ng loob sa isa’t-isa

Hindi maipaliwanag ang sayang nadarama tuwing magkasama

Waring puso ay tumatalon sa sobrang tuwa

Paningin ay umaaliwalas tuwing ikaw ay nasisilayan

Mahaba-haba na rin ang pinagsamahan bilang magkaibigan

Habang tumatagal lalong lumalalim ang pagkakaibigan

Na nauwi sa malalim na pagtitinginan

Tuwa sa mga mata’y walang kapantay

Mata’y hindi mapakali tuwing siya’y wala sa aking paningin

Sa bawat minuto’y siya ang ibig na masilayan

Puso ko’y tila napapaos na sa walang tigil na pagsigaw ng kanyang pangalan

Sa isipan, ang kanyang mukha ang laging nakikita

Ikaw ay nagtapat na ako’y iyong iniirog; ako’y hindi makapaniwala

Nanlalabo ang paningin

Hindi mawari kung ano ang dapat na isagot

Pagkasambit niya sa mga katagang iyon

Mga mata’y napatitig sa isa’t-isa

Bakas sa mga mata ang naguumapaw na tuwa

Kislap ng mga mata’y walang kaparis

Daig pa ang kislap ng mga bituin sa langit

Dahil sa kagustuhan kong marinig muli

Ang mga salitang kanyang binitiwan

Pilit kong pinapaulit

Munti kong kahilingan

Agad niyang dininig

Ang puso ko’y muli na namang tumalon sa sobrang tuwa

At tila nag-uumapaw ito sa pagmamahal sa kanya

Hindi na napigilan ang bibig na sambitin ang:

“Mahal din kita.”

Masaya ang naging pagsasama ng dalawang puso na dati’y nag-iisa

Nagbibigay kulay at kinang sa buhay ng isa’t-isa

Problema’t pagod ay kayang-kayang pawiin

Basta’t laging magkasama

Sa tuwing tayo ay namamasyal

Tayo ay magkahawak-kamay

Tila ayaw bumitiw sa isa’t-isa

Sabi ko sa kanya:

“tumingin ka na ng gusto mo

sigurado ako na marami kang makikita at magugustuhan

pero tumingin ka na sa lahat ng bagay

huwag lang sa ibang babae”

Ako’y iyong niyakap at sinabing ako lang ang mamahalin

At siya ay akin lamang

Sa paglipas ng panahon ikaw ay nananatili parin sa aking tabi

Lalong kumikinang kislap ng mga mata

Puwing sa mga mata na nagdudulot ng pagluha

Agad nating napapawi

Ngunit dumating ang araw, mga mata mo’y tila nanlabo na

Wala na ang dating kislap sa iyong mga mata

Ang aking iniirog na dati’y laging nasa aking tabi

Ngayo’y bihira na lamang makapiling

Sa tuwina’y ikaw ang laging hanap

Ng mga matang nais masilayan ang dating kislap ng iyong mga mata

Puso ko’y nalulugmok na sa kalungkutan

Isip ko’y hapo na sa kakaisip sa’yo

Sa kanyang pamamasyal kaya ay mayroon na siyang nahanap?

Hiling ko sa Panginoon na sana’y mali ang aking iniisip

Na sana sa kanyang pamamasyal

bagay ang kanyang nakita at nagustuhan

Paano nga ba mababawi ang dating kinang ng iyong mga mata

Na dati’y nakakasilaw at nakakahumaling

Kung sa iyong pamamasyal ikaw ay nakahanap na ng iba

Mata’y ibinaling na pala sa iba